Bashir Badr
kahan ansuon ki ye saughat hogi
nae log honge nai baat hogi
main har haal men muskurata rahunga
tumhari mohabbat agar saath hogi
charaghon ko ankhon men mahfuz rakhna
badi duur tak raat hi raat hogi
pareshan ho tum bhi pareshan huun main bhi
chalo mai-kade men vahin baat hogi
charaghon ki lau se sitaron ki zau tak
tumhen main milunga jahan raat hogi
jahan vadiyon men nae phuul aae
hamari tumhari mulaqat hogi
sadaon ko alfaz milne na paaen
na badal ghirenge na barsat hogi
musafir hain ham bhi musafir ho tum bhi
kisi mod par phir mulaqat hogi
Leave a Reply