ḳhud apne-ap se milne ka main apna irada huun
main har mausam ko sah kar bhi abhi tak istada huun
azal se mavara rangon se huun ye mera da.ava hai
asas-e-rang par jancho na mujh ko naqsh-e-sada huun
tira saaya hai a.ina chamakte aftabon ka
main apne jism men be-paikari ka ik labada huun
mujhe hairat, main ik nuqte ki surat kis tarah simTa
ḳhala hai aankh meri main samundar se kushada huun
mujhe lagti hai duniya ek Thokar apne paanv ki
main jaane kaisi ujḌi saltanat ka shahzada huun
mujhe lagte hain ḳhush sab seb surat aaj bhi ‘manzur’
ki main apne kisi ahd-e-shikasta ka i.aada huun
Leave a Reply