do-char gaam pas-e-rifaqat na kar sake
ham phir bhi un se koi shikayat na kar sake
kya aise ham-safar pe bharosa kare koi
jo dil ko bhi sharik-e-masafat na kar sake
insan ka ehtiram tha itna hamen aziiz
ham apne dushmanon se bhi nafrat na kar sake
ham log to kuchh aise qadamat-parast hain
paida kisi bhi kaam men jiddat na kar sake
chunte ho aisa qafila salar kis liye
jo ahl-e-karvan ki hifazat na kar sake
ham aise hukmaran the be-iḳhtiyar se
is dil ki saltanat pe hukumat na kar sake
naraz ham se hain vo hamare sukut par
lab kholne ki ḳhud bhi jo himmat na kar sake
‘shahid’ dayar-e-dil men andhera hai chaar su
raushan koi charagh-e-mohabbat na kar sake
Leave a Reply