meri izzat badh gai ik paan men
farq kya aaya tumhari shaan men
un ko dekha to kaha yuun kaan men
kyuun khalal daala mire iman men
ashiqi hai bahar-e-napaida-kanar
kashti-e-dil aa gai tufan men
hai yahi pahchan baali umr ki
baliyan vo do faqat hain kaan men
tere sadqe ke liye hazir hain sab
dur samundar men javahar kaan men
de ke dil us but ko apna kar liya
is tijarat men nahin nuqsan men
kya mai-e-gul-gun se raunaq ghat gai
rang balki aa gaya iman men
us but-e-kafir ko sajda kar liya
is se kya aaya khalal iman men
tum pari ka fakhr ho huron ka naaz
kaash hote firqa-e-insan men
us ke rukhsaron pe hai khat ki numud
hashiya ye hai naya quran men
gesu-e-pechan tire rukhsar par
sura-e-vallail hai quran men
ariz-e-taban pe hai khat ki numud
habshiyon ki fauj ya iran men
kah do pesh aaya kare achchhi tarah
chal na jaae mujh men aur darban men
vo karen zulm aur tum lab par na laao
varna gustakhi hai un ki shaan men
sunte sunte vaizon se hajv-e-mai
zoaf sa kuchh aa gaya iman men
yuun kahunga vuun kahunga tha khayal
ru-ba-ru kuchh bhi na aaya dhyan men
us ki qudrat se nahin ‘parvin’ baiid
raai ko parbat bana de aan men