Arsh Sahbai
main huun aise bikhra sa
jaise ḳhvab adhura sa
duur duur tak phaila hai
yadon ka ik sahra sa
be-shak aap nahin aate
kar dete koi va.ada sa
gham se ankhen bojhal hain
dil bhi hai kuchh bikhra sa
main us ki nazron men huun
kaghaz ka ik TukḌa sa
aql-o-junun men rahta hai
koi na koi jhagḌa sa
un se dil ki baat kahi
bojh hua kuchh halka sa
uḌi uḌi si rangat hai
har koi hai sahma sa
us ko haq hai jo bhi kare
vo hai mera apna sa
mera yahi asasa hai
ik dil vo bhi TuuTa sa
aap to chup se rahte hain
main hota huun rusva sa
‘arsh’ nigahon men aksar
lahra.e ik saaya sa
Leave a Reply