Poet
is daur se ḳhulus mohabbat vafa na maang
sahra se koi saaya koi aasra na maang
patton ke qahqahon men sada-e-buka na DhunD
jangal men rah ke shahr ki ab-o-hava na maang
samjhauta kar ke vaqt se chup-chap baiTh ja
qatil se zindagi ke abhi ḳhun-baha na maang
apne ḳhuda se silsila-e-guftugu na toḌ
ho jaa.e jo qubul to aisi dua na maang
ja apni laash ko kahin jangal men phenk aa
is shahr ke amiir se dad-e-vafa na maang
‘ḳhusrav’ safir-e-vaqt se gham ka mizaj puchh
maazi ki azmaton ka ḳhushi ka pata na maang
Leave a Reply