Hasan Naim
koh ke siine se ab-e-atashin laata koi
is nava-e-agahi ko Duub kar gaata koi
dekhta masti ka sangam lab hai ya guftar hai
jaam se mere jo apna jaam Takrata koi
badalon ki tarah aaya barq-asa chal diya
chand ki manind shab bhar to Thahar jaata koi
husn ka dil se ta.alluq da.imi hai garm hai
varna kis ka kis se hai rishta koi naata koi
mangne ko maang len ash.ar-e-gham se dilkashi
mil nahin sakta hai un ko fikr sa daata koi
nazish-e-farda mira husn-e-taghazzul hai ‘hasan’
ranj hota aaj gar kuchh qadr farmata koi
Leave a Reply