zarurat kuchh ziyada ho na jaa.e
samundar aur gahra ho na jaa.e
ye dhun ye mauj le Duube na mujh ko
bagula gharq-e-sahra ho na jaa.e
hava.en sar-barahna phir rahi hain
qaba-e-gul tamasha ho na jaa.e
abhi kuchh tiir tarkash men bhi honge
purana zaḳhm achchha ho na jaa.e
qayamat ki ghaḌi hai aaj suraj
sava neze se uncha ho na jaa.e
vahi imkan jis se Dar rahe hain
vahi imkan paida ho na jaa.e
miri har baat sachchi ho rahi hai
‘najib’ ik hashr barpa ho na jaa.e
Leave a Reply