Sajjad Syed
aisi hoti hain ba.az taqdiren
bahte paani pe jaise tahriren
ret ke ik gharaunde jaisi hain
aadmi ki jahan men tadbiren
ham ne to sirf ḳhvab dekhe the
bas men apne kahan thiin ta’biren
qasr-e-zar men saji huiin dekhin
muflison be-gharon ki tasviren
meri qismat men zulmaten saari
us ki muTThi men saari tanviren
ji men aata hai toḌ hi Dalun
saari hosh-o-ḳhirad ki zanjiren
yaad ke taar taar canvas par
ab bhi baaqi hain chand tasviren
baat ‘sajjad’ saaf kahta hai
aap jo chahen kar len tafsiren
Leave a Reply