kyuun na ho dad-talab himmat-e-mardana-e-dil
ma.il-e-husn-e-jahan-soz hai parvana-e-dil
ek ibrat ka muraqqa.a hai alam-ḳhana-e-dil
hasrat-o-yas ka afsana hai afsana-e-dil
jis ko rahti hai kisi aur ke jalve ki talash
us ne dekha hi nahin jalva-e-janana-e-dil
ab main samjha ki mohabbat men asar hai kitna
log sunte hain baḌe shauq se afsana-e-dil
qabil-e-dad hai ye shauq-e-talab ai saaqi
le ke aaya huun main TuuTa hua paimana-e-dil
ik zamane ko jila deta hai jal kar ai ‘arsh’
shola-e-barq-e-jahan-soz hai parvana-e-dil
Leave a Reply