poet

Apna Har Uzw Chashm-E-Bina Hai

apna har uzv chashm-e-bina hai

is qadar intizar tera hai

jo hai mahbub tera shaida hai

yusuf aage tiri zulekha hai

ek mah-ru baghal men sota hai

asman par dimagh apna hai

khaak men jo mila diya mujh ko

asman ne zamin ko saunpa hai

kis ne chehre se baal sarkae

shaam ko subh ashkara hai

ustukhvan tak kabhi guzar na kiya

mere haq men huma bhi anqa hai

tere qadmon pe kyuun na qais gire

naqsh-e-pa rashk-e-ru-e-laila hai

in dinon ai masih-e-dam tujh par

dam nikalta hai dam nikalta hai

taulun us sim-tan ko nazron men

ye mira jism-e-zar kanta hai

husn-e-khuban hilal-o-badr ki tarah

kabhi kam hai kabhi ziyada hai

us bayaban men le gai vahshat

mah-e-nau jis ka ek kanta hai

dil men rahta hai us kamar ka khayal

kya ye anqa ka ashiyana hai

aao ankhon men ek dam thahro

putliyon ka yahan tamasha hai

kaf-e-pa bhi na ham ko dikhlae

barhaman haath dekh jaata hai

yaar nam-e-khuda hai kashti men

nakhuda aaj paar beda hai

tera naqsh-e-qadam zamin pe nahin

asman par koi sitara hai

ham se tum dushmani lage karne

dosti ab nasib-e-aada hai

kah rahe hain shab-e-firaq men ham

aaj kis ko umid-e-farda hai

khaar chubh kar jo tutta hai kabhi

aabla phuut phuut rota hai

ankhen nargis hain rukh hai gul qad sarv

tu to ai gul chaman sarapa hai

kaam poshak se nahin ham ko

aib-poshi hamara sheva hai

de sulaiman ki us pari ko qasam

is tarah shishe men utara hai

zulf ne naqd-e-dil kiye hain jama

ab to ye saanp kodyala hai

pahunche hain gor ke kinare ham

ham se ab tak tumhen kinara hai

jurm ‘goya’ ke bakhshva dena

ya-mohammad faqir tera hai

More Poems

Leave a Comment