phir taqaza hai ki tajdid-e-vafa ho jaa.e
ḳhun-e-dil nazr karo farz ada ho jaa.e
ham hain sarshar-e-mohabbat na shikayat na gila
aap ko uzr hai to uzr-e-jafa ho jaa.e
tishna-lab koi na rah jaa.e tiri mahfil men
jashn hai aaj to rindon ka bhala ho jaa.e
tera mai-ḳhana salamat rahe abad rahe
saqiya ham ko bhi ik jaam ata ho jaa.e
sust-gami se nahin tab-e-ravan ko nisbat
jada-e-shauq pe aa.e to hava ho jaa.e
yuun taḌap ai dil-e-betab ki dhaḌkan se tiri
barq-raftar zamane ki faza ho jaa.e
zalimo soch lo anjam-e-sitam kya hoga
aaj ka din hi agar roz-e-jaza ho jaa.e
ahl-e-dil kaif-e-mohabbat hai usi ke dam se
dard-e-dil aur siva aur siva ho jaa.e
mai-kasho aao chalo shaiḳh-o-barahman se milen
raat ka pichhla pahar sarf-e-dua ho jaa.e
sub.h ho jaa.e to manzil ki taraf tez qadam
is qadar tez ki shal bang-e-dara ho jaa.e
raah men dair-o-haram aa.en to sajda kar lo
shayad is tarah gharibon ka ḳhuda ho jaa.e
Leave a Reply