us ki jam-e-jam ankhen shisha-e-badan mera
us ki band mutthi men saara bankpan mera
main ne apne chehre par sab hunar sajae the
faash kar gaya mujh ko saada pairahan mera
dil bhi kho gaya shayad shahr ke sarabon men
ab miri tarah se hai dard be-vatan mera
ek dasht-e-khamoshi ab mira muqaddar hai
yaad be-sada teri zakhm be-chaman mera
aao aaj ham donon apna apna ghar chun len
tum navah-e-dil le lo khitta-e-badan mera
roz apne khvabon ka khuun karta rahta huun
haae kin ghanimon se aa pada hai ran mera
gaanv ki havaon ne phir sandesa bheja hai
muntazir tumhara hai khushbuon ka ban mera
Leave a Reply