ghar men sahra hai to sahra ko ḳhafa kar dekho
shayad aa jaa.e samundar ko bula kar dekho
dasht ki aag baḌi chiiz hai ankhon ke liye
shahr bhi ḳhuub hi jalta hai jala kar dekho
tum ne ḳhushbu se kabhi ahd-e-vafa bandha hai
raushni ko kabhi bistar men liTa kar dekho
kis ne toḌa hai zamin aur qadam ka rishta
aaj ki raat yahi khoj laga kar dekho
ye baraste hue badal to na sone denge
koi bachpan ki kahani hi suna kar dekho
hijr achchha hai na ab us ka visal achchha hai
is liye aur kahin ishq laḌa kar dekho
Leave a Reply