Ghar Mein Sahra Hai to Sahra Ko KHafa Kar Dekho

ghar meñ sahrā hai to sahrā ko ḳhafā kar dekho

shāyad aa jaa.e samundar ko bulā kar dekho

dasht kī aag baḌī chiiz hai āñkhoñ ke liye

shahr bhī ḳhuub hī jaltā hai jalā kar dekho

tum ne ḳhushbū se kabhī ahd-e-vafā bāñdhā hai

raushnī ko kabhī bistar meñ liTā kar dekho

kis ne toḌā hai zamīñ aur qadam kā rishta

aaj kī raat yahī khoj lagā kar dekho

ye baraste hue bādal to na sone deñge

koī bachpan kī kahānī hī sunā kar dekho

hijr achchhā hai na ab us kā visāl achchhā hai

is liye aur kahīñ ishq laḌā kar dekho

Leave a Comment