Ravish Siddiqi
nik.hat-e-zulf ko ham-rishta-e-jan kahta huun
hosh aata hai to ḳhvab-e-guzaran kahta huun
dard ko daulat-e-sahab-nazaran kahta huun
gham ko sarmaya-e-isa-nafasan kahta huun
koi samjhe ki na samjhe magar ai sham-e-haram
main tujhe shola-e-ruḳhsar-e-butan kahta huun
qatra dariya hai to kyuun shorish-e-dariya-talabi
har tamanna ko mohabbat ka ziyan kahta huun
hai vo avaz-e-shikast-e-dil-e-giti jis ko
jaras-e-qafila-e-umr-e-ravan kahta huun
tohmat-e-sabza-e-begana hai sang-e-bedad
main to kanTon ko bhi phulon ki zaban kahta huun
kaun samjhega mire husn-e-yaqin ka aalam
arsh o tuuba ko hijabat-e-guman kahta huun
banda-e-ḳhak-nashinan-e-mohabbat huun ‘ravish’
ḳhaak ko masnad-e-ashufta-saran kahta huun
Leave a Reply