Humne Sikha Hai Mohabbat Karna

ham ne sīkhā hai mohabbat karnā

ek ik dil pe hukūmat karnā

ham bhī tārīḳh badal sakte haiñ

shart hai himmat-o-jur.at karnā

zeb detā nahīñ insānoñ ko

kisī insāñ kī ibādat karnā

rakh ke ḳhud apnī zarūrat ko udhār

puurī auroñ kī zarūrat karnā

shab kī tārīkī meñ sīkhā ham ne

chāñd tāroñ kī tilāvat karnā

āḳhirī saañs talak jīvan kī

mard kī shaan hai mehnat karnā

farz se haj ke hai afzal ‘hāfiz’

būḌhe māñ-bāp kī ḳhidmat karnā

Leave a Comment