fazaon men kuchh aisi khalbali thi
kaleja thaam kar vahshat chali thi
kabhi us ki javani manchali thi
kabhi duniya bhi sanche men Dhali thi
yahi a.ina-dar-a.ina ulfat
kabhi aks-e-ḳhafi naqsh-e-jali thi
na chhoḌa sard jhonkon ne vafa ko
jo shaḳh-e-dard ki tanha kali thi
bigaḌa kis ne hai tab-e-jahan ko
kabhi ye rind-mashrab bhi vali thi
muhit hangama-e-afaq par hai
sada-e-dard jo dil men pali thi
ghanimat janiye phir nim-raushan
charagh-e-rah se apni gali thi
bura ho agahi ka ziist varna
guzar jaati buri thi ya bhali thi
hamin ne ‘fauq’ chaha zindagi ko
hamin se kisht-e-gham phuli-phali thi
Leave a Reply