Razi Akhtar Shauq
safar kaThin hi sahi kya ajab tha saath us ka
andheri raat men mera diya tha haath us ka
kuchh aisi niind se jaagi ki phir na soi vo aankh
jala kiya yunhi kajal tamam raat us ka
tamam shab vo sitaron se guftugu us ki
tamam shab vo samundar sa iltifat us ka
kabhi vo rabt ki ankhon men jis tarah kajal
kabhi bichhaḌ ke vo milna ghazal-sifat us ka
dua ke haath hi jaise diya sambhalte hain
mohabbaton men vo uslub-e-ehtiyat us ka
main apne ghar ke andheron men lauT aaya ‘shauq’
pukarta hi raha mujh ko shahr-e-zat us ka
Leave a Reply