Shaz Tamkanat
ḳhvar-o-rusva the yahan ahl-e-suḳhan pahle bhi
aisa hi kuchh tha zamane ka chalan pahle bhi
muddaton ba.ad tujhe dekh ke yaad aata hai
main ne sikha tha lahu rone ka fan pahle bhi
dil-navaz aaj bhi hai nim-nigahi teri
dil-shikan tha tira be-saḳhta-pan pahle bhi
aaj is tarah mila tu ki lahu jaag uTha
yuun to aati rahi ḳhushbu-e-badan pahle bhi
‘shaz’ vo janega un ankhon men kya kya kuchh hai
jis ne dekhi ho un ankhon ki thakan pahle bhi
Leave a Reply