Ai Dil-E-Zar Likho Jaanib-E-Jaanan Kaghaz

ai dil-e-zar likho janib-e-janan kaghaz

haal ka likhte hain fuqara su-e-sultan kaghaz

marjaa-e-gabr-o-musalman hai vo but nam-e-ḳhuda

bhejte hain use hindu o musalman kaghaz

un ka mazmun bhi albatta huvaida hoga

ab jo aane lage us shoḳh ko pinhan kaghaz

haif hai sub.h-e-vatan se na hua varid-e-vaqt

hech gaahe ba-sar-e-sham-e-ghariban kaghaz

kisi ka bhi na javab aaya hamen ghurbat men

laakh ham likhe vatan ko su-e-yaran kaghaz

vasf afshan ka hai kis sim-badan ke likhna

kaghzi ham ko hai darkar zar-afshan kaghaz

is qadar ham ne giran kar diye likh likh ke kise

varna kis martaba the shahr men arzan kaghaz

likhte ham to ḳhat-e-mahbub ko har dam nau-ḳhat

likhne dete jo hamen dida-e-giryan kaghaz

mujh se divane ko kya ḳhat vo pari-zad likhe

likhte albatta hain insan su-e-insan kaghaz

bhejta huun main kisi rashk-e-gulistan ki taraf

mera pahunchae magar murgh-e-gulistan kaghaz

bhejta huun main kisi sani-e-bilqis ke saub

mera le jaae magar murgh-e-sulaiman kaghaz

kya magar bhuul gae bais-e-jamiyyat-e-ḳhvesh

ham ko bheje na adam se jo azizan kaghaz

kahte hain nisf mulaqat hai maktub bhi yaar

kabhi likkho to su-e-matam-e-nalan kaghaz

Leave a Comment