mila na khet se us ko bhi ab-o-dana kya
kisan shahr ko phir ik hua ravana kya
kahan se laa.e ho palkon pe tum guhar itne
tumhare haath laga hai koi ḳhazana kya
faza ka habs kisi taur ab nahin jaata
ki talḳh dhuup kya mausam koi suhana kya
tamam tarah ke samjhaute karne paḌte hain
miyan mazaq grihasti ko hai chalana kya
gunah kuchh to mujhe be-tarah lubhate hain
ye raaz khol hi deta huun ab chhupana kya
ho dushmani bhi kisi se to da.imi kyuun ho
jo TuuT jaa.e zara men vo dostana kya
ḳhabar-naves nahin huun main ek sha.er huun
tamam misre hain mere naya purana kya
na dhar le ruup kabhi jhonk men talatum ka
vo narm-rau hai nadi ka magar Thikana kya
karo to munh pe malamat karo miri ‘saurabh’
ye meri piiTh ke pichhe se phusphusana kya
Leave a Reply