zaban-e-hal pe sabr-o-raza ke lahje men
nava-e-gham hai tire be-nava ke lahje men
ye pa-e-jabr se rondi hui tamanna.en
hain mahv-e-girya-e-paiham dua ke lahje men
hava ka shor giran hai sama.at-e-gul par
so main huun tujh se muḳhatab saba ke lahje men
vaqar-e-ahd-e-mohabbat lihaz-e-shart-e-vafa
shikast-ḳhurda paḌe hain ana ke lahje men
ye sher yunhi nahin mo’atabar hue logon
‘vafa’ ka rang hai ibn-e-vafa ke lahje men
Leave a Reply