Ruh Mein Ghor Andhere Ko Utarne Na Diya

Ram Riyaz

ruuh men ghor andhere ko utarne na diya

ham ne insan men insan ko marne na diya

tere baad aisi bhi tanha.i ki manzil aa.i

ki mira saath kisi rahguzar ne na diya

kaun tha kis ne yahan dhuup ke badal barsa.e

aur tire husn ki chandi ko nikharne na diya

pyaas ki aag lagi bhuuk ki andhi uTThi

ham ne phir jism ka shiraza bikharne na diya

zindagi kashmakash-e-vaqt men guzri apni

din ne jiine na diya raat ne marne na diya

ashk barsa.e kabhi ḳhuun bahaya ham ne

gham ka dariya kisi mausam men utarne na diya