Poet
astane lahu men tar dekhe
ibn-e-mariyam salib par dekhe
ye karishma hai dair-o-ka.aba ka
jalte atish baghair ghar dekhe
dekhi taqdis nachte uryan
hanste us par haram ke dar dekhe
sham.a roi na hashr-e-mahfil par
luTte jazbat ta-sahar dekhe
phuul masle ga.e aqidat ke
jalve mahmil ke dar-ba-dar dekhe
chashm-e-ibrat men paḌ ga.e kanTe
dekhne vaale be-basar dekhe
paanv uThte nahin musafir ke
saanp ki tarah rahguzar dekhe
ham ko nisbat na ho sikandar se
ham bhaTakte rahen ḳhizar dekhe
‘baḳht’ Duuba kuchh is tarah sahil
chashm-e-barbad se bhanvar dekhe
Leave a Reply