Behzad Lakhnavi
tujh par miri mohabbat qurban ho na jaa.e
ye kufr baḌhte baḌhte iman ho na jaa.e
allah ri be-naqabi us jan-e-mudda.a ki
meri nigah-e-hasrat hairan ho na jaa.e
meri taraf na dekho apni nazar ko roko
duniya-e-ashiqi men haijan ho na jaa.e
palkon pe ruk gaya hai aa kar jo ek aansu
ye qatra baḌhte baḌhte tufan ho na jaa.e
hadd-e-sitam to hai bhi hadd-e-vafa nahin hai
zalim tira sitam bhi ehsan ho na jaa.e
hoti nahin hai vaq.at hoti nahin hai izzat
jab tak ki koi insan insan ho na jaa.e
us vaqt tak mukammal hota nahin hai koi
jab tak ki ḳhud ko apni pahchan ho na jaa.e
‘bahzad’ is liye main kahta nahin huun dil ki
Darta huun sun ke duniya hairan ho na jaa.e
Leave a Reply