Rawan Hai Mujh Mein Abhi Tak Wo Intiqam Ki Sham

ravan hai mujh men abhi tak vo intiqam ki shaam

tire baghair guzari jo tere naam ki shaam

Thahar ga.i hai yuun mujh men tire ḳhiram ki shaam

ki jaise gard-e-safar mahv ho qiyam ki shaam

sitara-zad ne jis shab jabin ko chuma tha

tavil guzri thi us shab ke intizam ki shaam

ye maslahat ka taqaza hai ya junun mera

guzar di hai safar men jo thi qiyam ki shaam

jise zamana-e-tauhid sub.h kahta hai

vo asal men hai mire aḳhiri imaam ki shaam

haqiqi sajdon ki qimat bata ga.i ham ko

vo zer-e-tegh namazon ke ehtimam ki shaam

vo kaise raat men hamrah ho gaya ‘tariq’

vo ek ḳhvab mila tha jo mujh se shaam ki shaam