Ishaq Athar Siddiqui
ai soz-e-darun rang-e-vafa aur hi kuchh hai
ab dil ke dhaḌakne ki sada aur hi kuchh hai
kuche men tire shor-e-fughan kam nahin lekin
darvesh-e-dua-go ki sada aur hi kuchh hai
dilkash hai bahut pairahan-e-lala-o-gul bhi
lekin tira andaz-e-qaba aur hi kuchh hai
jaise kisi mausam ka guzar hi na raha ho
kuchh din se zamane ki hava aur hi kuchh hai
daur-e-tarab-angez-chaman ḳhuub hai lekin
be-halqa-e-gul raqs-e-saba aur hi kuchh hai
nazrana-e-jan bhi nahin haq-dar-e-tavajjoh
shayad tira dastur-e-vafa aur hi kuchh hai
lahje to bahut shoḳh hain rangin-suḳhanon ke
‘at.har’ tira uslub-e-nava aur hi kuchh hai
Leave a Reply