sukun-e-qalb mayassar kise jahan men hai
tiri zamin men kahan vo jo asman men hai
maza hayat ka us shaḳhs se kabhi puchho
jo tez dhuup ki chadar ke sa.eban men hai
palak se TuuT ke jab ashk ḳhaak men mil jaa.e
samajh lo tab ye gharib-ul-vatan amaan men hai
mujhe bhi gunga bana.enge ek din ye log
mahal ka aib jo poshida is zaban men hai
vafa ḳhulus mohabbat bhi bik rahe hain miyan
har ek chiiz mayassar miri dukan men hai
usi ki zaat se is ghar ki bach ga.i izzat
jo khoTe sikke ki manind ḳhandan men hai
biTha diye hain kisi ne havaon par pahre
tabhi to itni ghuTan jism ke makan men hai
bichhaḌte vaqt jo tum ne kaha tha mujh se kabhi
vo jumla aaj bhi mahfuz mere kaan men hai
Leave a Reply