Jaleel Aali
subut-e-ishtiyaq-e-ham-rahi laao to aao
hisar-e-zat se bahar nikal paao to aao
zamanon se faqat lahren gumanon ki gino ho
kisi din tum ye dariya paar kar jaao to aao
had-e-ḳhvahish men jiina hai to jaao raah apni
na dasht-e-shauq ki vus.at se ghabrao to aao
ajab be-iḳhtiyarana thi har aamad tumhari
isi mauj-e-mohabbat men kabhi aao to aao
ye durveshon ki duniya hai karishme is ke dekho
jahan se hi nahin ḳhud se bhi uktao to aao
rifaqat ahl-e-gham ki ik nashat-e-muḳhtalif hai
jo rakhte ho jigar men dard ka ghaao to aao
hamen is hikmat-e-dauran ka ik nukta bahut hai
agar dhun hai ulaT den vaqt ke daao to aao
Leave a Reply