Dil Gham-E-Rozgar Se Nikla

dil ġham-e-rozgār se niklā

kis ghane ḳhārzār se niklā

ham-safar ho ga.e mah-o-anjum

maiñ jo apne hisār se niklā

shor thā lāThiyoñ kā saḌkoñ par

saañp ghar kī darār se niklā

jis ko kāñTā samajh rahe the log

us kā rishta bahār se niklā

kar gayā muntashir nizām-e-jahāñ

jo bhī zarra qatār se niklā

ho gayā bahr-e-be-karāñ vo ‘salīm’

jo bhī dariyā kanār se niklā

Leave a Comment