Saleem Ansari
dil gham-e-rozgar se nikla
kis ghane ḳharzar se nikla
ham-safar ho ga.e mah-o-anjum
main jo apne hisar se nikla
shor tha laThiyon ka saḌkon par
saanp ghar ki darar se nikla
jis ko kanTa samajh rahe the log
us ka rishta bahar se nikla
kar gaya muntashir nizam-e-jahan
jo bhi zarra qatar se nikla
ho gaya bahr-e-be-karan vo ‘salim’
jo bhi dariya kanar se nikla
Leave a Reply