Niyaz Sultanpuri
bhaa.i badal gaya kabhi beTa badal gaya
aaya jo vaqt ḳhuun ka rishta badal gaya
har zulm-e-na-rava ka muḳhalif raha tha jo
mansab mila to us ka bhi lahja badal gaya
vo sidhe-sade log vo chaupal ab kahan
ek ek karke gaanv ka naqsha badal gaya
patthar vahi gali bhi vahi log bhi vahi
lekin sitam-shi.ar ka pesha badal gaya
dariya-dili pe apni bahut naaz tha use
dekhi hamari pyaas to rasta badal gaya
kaise hamare gaanv ka hota koi vikas
kursi badal ga.i kabhi neta badal gaya
ab inqilab-e-dahr ki baten kahan ‘niyaz’
jis fikr-o-fan pe naaz tha kab ka badal gaya
Leave a Reply