hain mire vajud men maujzan miri ulfaton ki nishaniyan
na huiin nasib jo qurbaten unhin qurbaton ki nishaniyan
thaki haari shakl niDhal si kisi imtihan ke saval si
mire jism-o-jan pe sabt hain tiri furqaton ki nishaniyan
kabhi ankhen ghaiz se tar-ba-tar kabhi la.an-ta.an zaban par
mujhe meri jaan se aziiz hain tiri nafraton ki nishaniyan
ho vo bu-e-gul ki ho ragni ho vo abshar ki chandni
hain qadam qadam pe saji huiin tiri nuz.haton ki nishaniyan
ka.i baar roz ka.i jagah miri ruuh paḌhti hai fatiha
mire puure jism men dafn hain miri hasraton ki nishaniyan
kahin nachti huiin mastiyan kahin bhuuk se hain laḌa.iyan
kahin daulaton ke muzahire kahin ghurbaton ki nishaniyan
vo zamin ho ki ho asman vo pahaḌ hon ki hon vadiyan
hain chahar samt mire ḳhuda tiri rahmaton ki nishaniyan
Leave a Reply