tiir nazron men to abru men kaman DhunDta huun
us ki ankhon men ga.i rut ke nishan DhunDta huun
nashsha-e-qurb se baḌh kar hai tiri khoj mujhe
tu jahan mil na sake tujh ko vahan DhunDta huun
taaza varid huun miyan aur ye shahr-e-dil hai
kuchh kamane ko yahan kar-e-ziyan DhunDta huun
shak ki be-samt masafat hi mujhe maar na de
jo yaqin mujh ko dila de vo guman DhunDta huun
apne andar mujhe karbal ka saman lagta hai
sar-bulandi ke liye nok-e-sinan DhunDta huun
asr-e-hazir bhi lage harf-e-mukarrar ‘jazib’
apne hone ke liye taaza jahan DhunDta huun
Leave a Reply