jo mushkil raste hain un ko yuun hamvar karna hai
hamen jazbon ki kashti se samundar paar karna hai
hamare hausle majruh karna chahte hain vo
hamen suraj ke rukh par saya-e-divar karna hai
jo thak kar so gae hain vo to khud hi jaag jaenge
abhi jaage hue logon ko bas bedar karna hai
utha lo haath men parcham mohabbat ke parastaron
chalo nafrat ki divaren abhi mismar karna hai
jahalat ke andheron se nimatne ke liye ‘nusrat’
charaghon ka hamen ik karvan tayyar karna hai
Leave a Reply