Akhtar Shirani
chal ai nasim-e-sahra ruh-o-ravan-e-sahra
mera payam le ja su-e-butan-e-sahra
sahrai mahvashon ki khidmat men ja ke kahna
bhule nahin tumhen ham ai dukhtaran-e-sahra
gar bas chale to aaen aur dard-e-dil sunaen
tum ko gale lagaen ham phir miyan-e-sahra
tum najd men pareshan shahron men ham hain hairan
allah ki amaan ho tum par butan-e-sahra
tum is tarah ghamon se behal ho rahi ho
ham is taraf hain muztar daman-kushan-e-sahra
ham paas aaen kyuun kar tum ko bulaen kyuun kar
ye dukh mitaen kyuun kar vamandgan-e-sahra
betab hain alam se be-khvab ranj-o-gham se
kya puchhti ho ham se ai dil-baran-e-sahra
tum yaad kar rahi ho bedad kar rahi ho
barbad kar rahi ho ai gul-rukhan-e-sahra
ye kya kaha ki tum ho ranginiyon ke khugar
ghamgin hain tum se badh kar ai gham-kushan-e-sahra
ye raat ye ghataen ye shor ye havaen
bichhde hue milenge kyunkar miyan-e-sahra
shahron ki zindagi se ham tang aa chuke hain
sahra men phir bula lo ai sakinan-e-sahra
yad-e-sumum ho ya sarsar ke tund tufan
darte nahin kisi se dil-dadgan-e-sahra
abadiyon men hasil azadiyan nahin hain
aa jaao tum hi ud kar o tairan-e-sahra
sahra ki vusaton men ham ko na bhuul jaana
o dukhtaran-e-sahra o ahuvan-e-sahra
ai abr chup na rahna mera fasana kahna
mil jaae gar kahin vo sarv-e-ravan-e-sahra
dashti ki dhun men saaqi ik naghma-e-iraqi
haan phir suna ba-yad-e-gul-chehargan-e-sahra
ankhon men bas raha hai naqsh-e-butan-e-sahra
o dastan-sara chhed ik dastan-e-sahra
mastana ja raha hai phir karvan-e-sahra
haan jhuum kar hudi-khvan ik dastan-e-sahra
dehat ki fazaen ankhon men phir rahi hain
dil men sama rahi hai yad-e-butan-e-sahra
nazron pe chha raha hai vo chandni ka manzar
sahra men khelti thiin jab huryan-e-sahra
vo chandni ka mausam vo be-khudi ka aalam
vo nuur ka samundar reg-e-ravan-e-sahra
jalve mah-e-javan ke vo rang-e-karvan ke
vo naghme sarban ke raqsan miyan-e-sahra
kyunkar na yaad aaen vo sim-gun fazaen
vo asman-e-sahra mah-e-ravan-e-sahra
vo kam-sinon ke gaane vo khel vo tarane
be-fikri ke fasane vird-e-zaban-e-sahra
kheton men ghumte the har gul ko chumte the
masti men jhumte the jab mai-kashan-e-sahra
vo gaanv vo fazaen vo fasl vo havaen
vo khet vo ghataen vo asman-e-sahra
phir yaad aa rahi hain phir dil dukha rahi hain
majnun bana rahi hain laila-vashan-e-sahra
raton ko chhup ke aana aur shane ko hilana
hai yaad vo jagana ham ko miyan-e-sahra
vo un ki shokh ankhen vo un ki saada nazren
be-khud bana rahi hain doshizgan-e-sahra
vo ishq-pesha huun main jis ke javan naghme
gaata hai chandni men har naujavan-e-sahra
ik badviyat ka ashiq sahraiyat se be-khud
‘akhtar’ bhi apni dhun men hai ik javan-e-sahra
Leave a Reply