Sukut-E-Shab Ke Hathon Saunp Kar Wapas Bulata Hai

Ashar Najmi

sukut-e-shab ke hathon saunp kar vapas bulata hai

miri avargi ko mera ghar vapas bulata hai

main jab bhi da.eron ko toḌ kar bahar nikalta huun

hava ke na-tavan jhonke ka Dar vapas bulata hai

usi ke hukm par us ko main tanha chhoḌ aaya tha

ḳhuda jaane mujhe vo kyuun magar vapas bulata hai

ishare kar raha hai duriyon ka khaulta sagar

mujhe har shaam ik andha safar vapas bulata hai

vo jin ki hijraton ke aaj bhi kuchh daagh raushan hain

unhi bichhḌe parindon ko shajar vapas bulata hai

sulagti sa.aton ka ḳhauf ab kamzor hai shayad

vahi sahma hua dast-e-hunar vapas bulata hai