Rashid Shahjahanpuri
baiTha huun dil men yaar ko mehman kiye hue
zarre ko rashk-e-mahr-e-daraḳhshan kiye hue
teri nigah-e-lutf ke shayan kiye hue
laaya huun dil ko rashk-e-gulistan kiye hue
ik main ki jam.a apne hi dil ko na kar saka
ik tum ki jitne dil bhi pareshan kiye hue
yuun kah raha huun girya-e-furqat ka majra
har ashk hai tahayya-e-tufan kiye hue
kahti hai ab vo aankh mira qissa-e-vafa
ehsas-e-infi.al ko unvan kiye hue
baiThe hain ahl-e-shauq tiri jalva-gah men
tar-e-nazar ko tar-e-rag-e-jan kiye hue
ehsas ki hudud men kyon kar Thahar sake
jo dil ho sair-e-alam-e-vijdan kiye hue
ik jannat-e-nigah hai ankhon ke samne
dil hai tasavvur-e-ruḳh-e-janan kiye hue
tauba ka ehtiram baja lekin ai ‘rashid’
pas-e-sila-e-rahmat-e-yazdan kiye hue
Leave a Reply