Dr Naresh
gham hai azar hai aziyyat hai
ek dil hai hazar aafat hai
husn rangini-e-hayat sahi
ishq bhi aadmi ki fitrat hai
aaj allah ko janta hai kaun
ḳhvahish-o-hirs ki ibadat hai
teri kafir adaon ko qatil
tegh-o-ḳhanjar ki kya zarurat hai
kuchh to farma.iyega banda-navaz
ḳhamushi aap ki qayamat hai
daur-e-hazir ke aadmi ka chalan
ba.is-e-nang-e-adamiyat hai
ḳhuun din raat ro rahe hain ‘naresh’
kya yahi hasil-e-mohabbat hai
Leave a Reply