naz-e-but-e-mahvash par qurban dil-o-jan hai
ye shan-e-ḳhuda ḳhuda-e-shahid-e-gharat-gar-e-iman hai
jo baat bhi hai pyari jo chaal bhi hai achchhi
aan us ki nahin maḳhfi shaan us ki numayan hai
hamrah chalun us ke kuchh baat karun us se
muddat se ye hasrat hai muddat se ye arman hai
vo mujh ko dikhate hain har aan naya jalva
mere liye har jalva sarmaya-e-ehsan hai
girdab-e-havadis men ḳhush huun ki miri kashti
na-dida-e-sahil hai parvarda-e-tufan hai
hansta hua aaya hai hans hans ke rula.ega
vo ahd-shikan phir ab amada-e-paiman hai
‘manzur’ use dil dena dil de ke ḳhalish lena
ye bhi koi hasrat hai ye bhi koi arman hai
Leave a Reply