Behzad Lakhnavi
ḳhuda ko DhunD raha tha kahin ḳhuda na mila
zahe-nasib ki bande ko mudda.a na mila
nigah-e-shauq men be-nuriyon ka rang baḌha
nigah-e-shauq ko jab koi dusra na mila
ham apni be-ḳhudi-e-shauq par nisar rahe
ḳhudi ko DhunDh liya jab hamen ḳhuda na mila
tumhari bazm men lab khol kar hua ḳhamosh
vo bad-nasib jise koi aasra na mila
har ek zarre men main ḳhud to aa raha tha nazar
ajiib baat tumhara kahin pata na mila
bas ik sukun hi ham ko na mil saka ta-umr
vagarna tere tasadduq men ham ko kya na mila
tiri nigah-e-mohabbat-navaz hi ki qasam
ki aaj tak to hamen tujh sa dusra na mila
tira jamal fazaon men muntashir tha magar
nigah-e-shauq ko phir bhi tira pata na mila
hazar Thokaren kha.in hazar su ‘bahzad’
jahan-e-husn men koi bhi ba-vafa na mila
Leave a Reply