Najmus Saqib
badan ko jaan se juda ho ke zinda rahna hai
ye faisla hai fana ho ke zinda rahna hai
yahi nahin ki mire gird khinchni hain haden
mire ḳhuda ne ḳhuda ho ke zinda rahna hai
hazaron log the tauq-e-ana saja.e hue
faqat mujhe hi riha ho ke zinda rahna hai
mujhe to ḳhair shab-e-hijr maar Dalegi
tumhen to mujh se juda ho ke zinda rahna hai
durust hai ki juda.i men maut aa jaa.e
magar ye kya ki ḳhafa ho ke zinda rahna hai
kisi ko maut na aa.i kisi ke marne par
sabhi ne dukh se siva ho ke zinda rahna hai
Leave a Reply