Muzaffar Warsi
ham karen baat dalilon se to radd hoti hai
us ke honTon ki ḳhamoshi bhi sanad hoti hai
saans lete hue insan bhi hain lashon ki tarah
ab dhaḌakte hue dil ki bhi lahad hoti hai
jis ki gardan men hai phanda vahi insan baḌa
suliyon se yahan paima.ish-e-qad hoti hai
sho.abda-gar bhi pahante hain ḳhatibon ka libas
bolta jahl hai bad-nam ḳhirad hoti hai
kuchh na kahne se bhi chhin jaata hai ejaz-e-suḳhan
zulm sahne se bhi zalim ki madad hoti hai
Leave a Reply