ye narm narm hava jhilmila rahe hain charagh
tire ḳhayal ki ḳhushbu se bas rahe hain dimagh
dilon ko tere tabassum ki yaad yuun aa.i
ki jagmaga uThen jis tarah mandiron men charagh
jhalakti hai khinchi shamshir men na.i duniya
hayat o maut ke milte nahin hain aaj dimagh
harif-e-sina-e-majruh o atish-e-gham-e-ishq
na gul ki chak-garebaniyan na laale ke daagh
vo jin ke haal men lau de uThe gham-e-farda
vahi hain anjuman-e-zindagi ke chashm-o-charag
tamam sho.ala-e-gul hai tamam mauj-e-bahar
ki ta-had-e-nigah-e-shauq lahlahate hain baagh
na.i zamin naya asman na.i duniya
suna to hai ki mohabbat ko in dinon hai faragh
jo tohmaten na uThin ik jahan se un ke samet
gunahgar-e-mohabbat nikal ga.e be-dagh
jo chhup ke taron ki ankhon se paanv dharta hai
usi ke naqsh-e-kaf-e-pa se jal uThe hain charagh
jahan-e-raz hui ja rahi hai aankh tiri
kuchh is tarah vo dilon ka laga rahi hai suragh
zamana kuud paḌa aag men yahi kah kar
ki ḳhuun chaaT ke ho ja.egi ye aag bhi baagh
nigahen matl.a-e-nau par hain ek aalam ki
ki mil raha hai kisi phuTti kiran ka suragh
dilon men dagh-e-mohabbat ka ab ye aalam hai
ki jaise niind men Duube hon pichhli raat charagh
‘firaq’ bazm-e-charaghan hai mahfil-e-rindan
saje hain pighli hui aag se chhalakte ayagh
Leave a Reply