hijab-abbasi

Dua Hi Wajh-E-Karamat Thodi Hoti Hai

dua hi vajh-e-karamat thodi hoti hai

ghazab ki dhuup men barsat thodi hoti hai

rah-e-vafa ki rivayat hai sar jhuka rakhna

bisat-e-ishq pe ye maat thodi hoti hai

jo apna naam saf-e-mo’tabar men likhte hain

khud un se apni mulaqat thodi hoti hai

bahut se raaz dilon ke dilon men rahte hain

use batane ki har baat thodi hoti hai

dil o nazar men jo bas jaae dil-ruba thahre

ki dilrubai koi zaat thodi hoti hai

‘hijab’ ahl-e-junun men shumar hone ki

asaas izzat-e-sadat thodi hoti hai

More Poems

Leave a Comment