Abbas Tabish
itna asan nahin masnad pe bithaya gaya main
shahr-e-tohmat tiri galiyon men phiraya gaya main
mere hone se yahan aai hai paani ki bahar
shakh-e-girya tha sar-e-dasht lagaya gaya main
ye to ab ishq men ji lagne laga hai kuchh kuchh
is taraf pahle-pahal gher ke laaya gaya main
khuub itna tha ki divar pakad kar nikla
us se milne ke liye surat-e-saya gaya main
tujh se kuchh kahne ki himmat hi nahin thi varna
ek muddat tiri dahliz tak aaya gaya main
khalvat-e-khas men bulvane se pahle ‘tabish’
aam logon men bahut der bithaya gaya main
Leave a Reply