apni kami se puchh na us ki kami se puchh
ismat ka bhaav jism ki bechargi se puchh
gharon men rahne valon ki shaistagi ka qad
sadkon pe raqs karti hui agahi se puchh
mujh men ye intishar ye nafrat hai kis liye
guzre hue samaj ki divangi se puchh
daali se chhut jaane ka anjam kya hua
barg-e-khizan-rasida ki avargi se puchh
ashkon men iltijaon men taqat nahin hai kyuun
zehnon pe raaj karti hui be-hisi se puchh
khulne ke intizar men jo zard ho gai
rang-e-suluk bad-e-saba us kali se puchh
bandon ke silsile men bahut tu ne kah liya
allah apne baare men kuchh aadmi se puchh
Leave a Reply