jab raston se ishq-e-kamil hota hai
tab banda nazdik-e-manzil hota hai
hamdardi hai dil men to phir raah dikha
bas tanqidon se kya hasil hota hai
haq ki baten us ki samajh men aati hain
jis bande ke siine men dil hota hai
rishton se samjhauta karna paḌta hai
varna kaun kisi ke qabil hota hai
hairat hai vo jis ko ham se rabt nahin
dil bhi us ki janib maa.il hota hai
aaj kahan insaf ka mandir milta hai
aaj kahan qaazi hi aadil hota hai
ḳhud se to namrud nahin banta koi
asal men puura shahar hi babul hota hai
ham ko to hansne ki aadat hai varna
muskanon men dard bhi shamil hota hai
‘haidar’ dil men basne vaala hi aksar
dil ke armanon ka qatil hota hai
Leave a Reply