Aur Mushkil Ye Aa paDi Hum Par

aur mushkil ye aa paḌī ham par

tanz karte haiñ aap bhī ham par

phir bhī zinda haiñ ham zamāne meñ

har jafā us ne toḌ lī ham par

miT rahe haiñ ḳhulūs ke bande

ḳhatm hai daur-e-āshiqī ham par

sāda-lohī kā ye sila paayā

ab bigaḌtā hai har koī ham par

bin tire ghūmte haiñ jab tanhā

muskurātī hai chāñdnī ham par

ek tohmat haiñ zindagī par ham

ek tohmat hai zindagī ham par

roz jaur-o-itāb hotā hai

ho nigah lutf kī kabhī ham par

kyā ḳhabar thī ki ek din ‘āsī’

muskurā.egā har koī ham par

Leave a Comment