Pandit Vidya Rattan Asi
aur mushkil ye aa paḌi ham par
tanz karte hain aap bhi ham par
phir bhi zinda hain ham zamane men
har jafa us ne toḌ li ham par
miT rahe hain ḳhulus ke bande
ḳhatm hai daur-e-ashiqi ham par
sada-lohi ka ye sila paaya
ab bigaḌta hai har koi ham par
bin tire ghumte hain jab tanha
muskurati hai chandni ham par
ek tohmat hain zindagi par ham
ek tohmat hai zindagi ham par
roz jaur-o-itab hota hai
ho nigah lutf ki kabhi ham par
kya ḳhabar thi ki ek din ‘asi’
muskura.ega har koi ham par
Leave a Reply