shamil tu mire jism main sanson ki tarah hai
ye yaad bhi sukhe hue phulon ki tarah hai
dil jis ka nahin harf-e-mohabbat se shanasa
vo zindagi viran mazaron ki tarah hai
fitrat men hai daulat ke khilaunon se bahalna
ik dost mira shahr men bachchon ki tarah hai
har raat charaghan sa raha karta hai ghar men
ik zaḳhm mire dil men sitaron ki tarah hai
mat kholiyo mujh par kabhi ehsan ke dariche
ghairat mujhe pyari tiri yadon ki tarah hai
patthar sada zillat ke ta.aqub men rahenge
kotahi-e-guftar gunahon ki tarah hai
Leave a Reply