ik ḳhana-e-matam hi ye aalam to nahin hai
taqdir-e-bashar nauha-e-paiham to nahin hai
naghmat-e-masarrat bhi hain lamhat-e-tarab bhi
ye sham-e-alam virsa-e-adam to nahin hai
ḳhushbu ka tabassum bhi hai rangon ki hansi bhi
gulshan men faqat girya-e-shabnam to nahin hai
kuchh aur bhi jazbe hain jo dildar hain dil ke
ik gham hi dil-e-zar ka marham to nahin hai
ik sham.a andheron men abhi tak hai farozan
go tez nahin raushni maddham to nahin hai
ik chashma-e-tanvir bhi phuTega yahin se
mayus shab-e-tar se ‘akram’ to nahin hai
Leave a Reply